December 1, 2025 3:24 am

महात्मा गांधी विद्यालयात इनोव्हेशनचे महापर्व : विज्ञान गणित प्रदर्शनाला उत्स्फूर्त प्रतिसाद

 अहिल्यानगर मराठी न्यूज अहिल्यानगर

शोध, प्रयोग आणि रंगांची जादू ! महात्मा गांधी विद्यालयाचे प्रदर्शन यशस्वी

प्रवरानगर प्रतिनिधी – महात्मा गांधी विद्यालय व कनिष्ठ महाविद्यालयात आयोजित शाखास्तरीय गणित, विज्ञान आणि रांगोळी प्रदर्शन उत्साहात व अत्यंत यशस्वीपणे पार पडले. तालुकास्तरीय प्रदर्शनासाठी निवड प्रक्रियेचा एक महत्त्वाचा टप्पा असलेल्या या उपक्रमात विद्यालयातील तसेच कनिष्ठ महाविद्यालयातील विद्यार्थ्यांनी मोठ्या उत्साहाने सहभाग नोंदवत आपली सर्जनशीलता आणि वैज्ञानिक दृष्टिकोन प्रभावीपणे मांडला.

प्राचार्य विनायक मेथवडे आणि उपप्राचार्या अलका आहेर यांच्या मार्गदर्शनाखाली या स्पर्धा आयोजित करण्यात आल्या. प्रदर्शनाचे उद्घाटन माजी प्राचार्य मधुकर अनाप, मुख्याध्यापिका नलिनी जाधव आणि उपमुख्याध्यापक दिलीपराव डहाळे यांच्या हस्ते करण्यात आले. शाश्वत शेती, कचरा व्यवस्थापन, प्लास्टिकला पर्याय, हरित ऊर्जा, उदोन्मुख तंत्रज्ञान, आरोग्य आणि स्वच्छता, जलसंवर्धन व व्यवस्थापन यांसारख्या समकालीन आणि समाजोपयोगी विषयांवर विद्यार्थ्यांनी आकर्षक मॉडेल साकारले.

सहावी ते आठवी लहान गट आणि नववी ते बारावी मोठा गट अशा दोन विभागात विद्यार्थ्यांच्या एकूण ६५ मॉडेल्सचे सादरीकरण करण्यात आले. माध्यमिक विभागात विज्ञान लहान गटात ओम काळवाघे, विज्ञान मोठ्या गटात अनंत जाधव यांनी प्रथम क्रमांक पटकावला. गणित लहान गटात सिद्धांत साळवे तर गणित मोठ्या गटात जुनेद इनामदार यांना प्रथम क्रमांक मिळाला.

कनिष्ठ महाविद्यालयातील विज्ञान, गणित, पर्यावरण आणि भौगोलिक रांगोळी स्पर्धेत गौरी नन्नावरे आणि पूजा वायकर यांनी चमकदार यश मिळवत प्रथम क्रमांक पटकावला. कनिष्ठ विभागात सुजल थोरात, विराज गायकवाड, आदित्य गाडेकर, तनुजा भालेराव, जिकरा तांबोळी आणि रोहन मोरे यांच्या सादरीकरणालाही परीक्षकांनी विशेष दाद दिली.

या प्रदर्शनासाठी डॉ. शरद दुधाट, विठ्ठल म्हसे, विश्वास मोहिते, शिवाजी काळे, शरयू खर्डीकर आणि शितल राजगुरू यांनी परीक्षक म्हणून काम पाहिले. तर प्रदर्शनाच्या यशस्वी आयोजनासाठी शाहिस्ता शेख, देवेश आहेर, प्रतिभा ठोकळ, प्रियंका भालेराव, निर्मला शिंदे यांच्यासह सर्व शिक्षक व विद्यार्थ्यांनी विशेष परिश्रम घेतले.

विद्यार्थ्यांच्या नवोन्मेषी कल्पना, प्रयोगशीलता आणि कलात्मकतेचे दर्शन घडविणारे हे प्रदर्शन सर्जनशीलतेचा उत्सव ठरले.

अधिक वाचा

Cricket Live Score

Corona Virus

Rashifal

और पढ़ें