निंभेरे–तुळापूर –श्री स्वामी समर्थ सेवा, आध्यात्मिक विकास व बालसंस्कार केंद्र (दिंडोरी प्रणित) यांच्या वतीने श्री दत्तजयंती निमित्त सुरू झालेल्या अखंड नामजप, गुरुचरित्र पारायण आणि दिव्य महायज्ञ सप्ताहाने निंभेरे–तुळापूर या पवित्र भूमीला अलौकिक आध्यात्मिक तेजाने उजळून टाकले आहे. परिसरातील प्रत्येक कणात दत्तमहिमेचे निनाद दुमदुमत असून भक्तीभावाचे सुवर्णकिरण आकाशात झेपावत आहेत.
गुरुवार, दि. २७ नोव्हेंबर रोजी ग्रामदेवतेच्या पुजनाने या अध्यात्मिक सप्ताहाचा मंगल प्रारंभ झाला. सुरुवातीपासूनच हवेत एक सूक्ष्म शांतलहरी पसरली असून भक्तांच्या मनांत अद्वितीय शांतीची अनुभूती उमटत आहे. मंत्रोच्चारांची स्पंदने, दीपज्योतींचे तेज आणि वातावरणात दरवळणारी पवित्र सुगंधी दिव्यता या दोन्ही गावांना अनन्यसाधारण अध्यात्मिक अनुभूती देत आहेत.
दररोज पहाटेपासून अखंड गुरुचरित्र,स्वामीचरित्र, नवनाथ व दुर्गासप्तशती पारायण सुरू असून सर्वत्र भक्तिरसाची सुफळ झुळूक वाहत आहे. “श्री स्वामी समर्थ!” चा अखंड जयघोष, वीणेच्या पवित्र तारांचे निनाद आणि प्रहर सेवेची शांती यामुळे भक्तांच्या हृदयातील अस्थैर्य, अशांती व नकारात्मकता क्षणात नाहीशी होत आहे. विशेष म्हणजे—या पारायणस्थळी मागील दोन दिवसांपासून एक श्वान नियमितपणे उपस्थित राहत असून भक्तजन त्याला दैवी संकेत मानत आहेत.
यज्ञकुंडातील पवित्र ज्वालांचे तेज या सप्ताहाचे महत्त्व वाढवत आहे. गणेश याग, मनोबोध याग, चंडी याग, स्वामी याग, गायत्री याग आणि सहस्रावर्तन यागांनी वातावरणात दिव्य शक्ती पसरवली आहे. मंत्रोच्चारांतून प्रकटणारी केवळ ध्वनी नव्हे तर आध्यात्मिक तरंग भक्तांच्या मनःशुद्धी, आत्मशुद्धी आणि जीवनशुद्धीची अनुभूती देत आहेत. धूप–दीपाची सुवासिकता आणि यज्ञज्वालेचा तेजोमय प्रकाश भक्तांचे क्लेश, दुःख आणि मानसिक अंधार दूर करत नवचैतन्य निर्माण करीत आहे.
गुरुवार, दि. ४ डिसेंबर रोजी दुपारी १२.३० वाजता होणारा श्री दत्त जन्मोत्सव हा सप्ताहातील सर्वोच्च भावमय क्षण ठरणार असून भक्तांच्या मनात त्याबाबत आधीपासूनच दिव्य उत्सुकता भरून आहे. परिसर दत्तमहिमेच्या अद्वितीय तेजाने उजळेल, अशी सर्वांची भावना आहे.
शुक्रवार, दि. ५ डिसेंबर रोजी होणारे श्री सत्यदत्त पूजन व विसर्जन हा या दिव्य सप्ताहाचा भावपूर्ण समारोप असेल. आठ दिवसांच्या अखंड साधना आणि भक्तीसेवेनंतर अनेक भक्तांच्या डोळ्यांत समाधानाचे अश्रू दाटून येतील. हा अध्यात्मिक प्रवास त्यांच्या जीवनावर कायमचा पवित्र ठसा उमटवून जाईल.
दिंडोरी प्रणित सेवाकेंद्रात भारतीय संस्कृतीतील सोळा संस्कारांचे महत्त्व अधोरेखित केले जाते. शरीरशुद्धी, मनशुद्धी, आत्मशुद्धी आणि ज्ञानशुद्धी या संस्कारांच्या माध्यमातून जीवन शुद्ध, तेजस्वी आणि उन्नत होऊ शकते, हा संदेश येथे सातत्याने दिला जातो. “संस्कार राहिले तर संस्कृती टिकते; संस्कृती टिकली तर राष्ट्र बलवान होते,” या तत्त्वाने येथील बालसंस्कार विभाग कार्यरत आहे. मराठी अस्मिता, संस्कृती, राष्ट्रधर्म आणि नैतिक मूल्यांवरही विशेष मार्गदर्शन केले जाते.
आयोजकांचे भक्तिपूर्ण आवाहन :“या पवित्र सप्ताहात सहभागी व्हा… मन शांत होईल, हृदय उजळेल आणि जीवनाला नवदिव्यता लाभेल.”
