हनुमंतगांव प्रतिनिधी संदिप गावडे – समाजातील दीन-दुबळे, शोषित, वंचित, मागास समाजघटकांना शिक्षणाचा प्रकाश देत अन्याय-अत्याचाराच्या काळोखात क्रांतीचा मशाल पेटवणारे क्रांतिसूर्य महात्मा ज्योतिराव फुले यांच्या पुण्यतिथी निमित्त हनुमंतगावातील ज्ञानदीप वाचनालयात शुक्रवार, दि. २८ नोव्हेंबर रोजी त्यांना विनम्र अभिवादन करण्यात आले. ग्रामस्थांच्या उत्स्फूर्त सहभागामुळे कार्यक्रमाला विशेष ऊर्जित वातावरण लाभले.कार्यक्रमाची सुरुवात महात्मा फुले यांच्या प्रतिमेस पुष्पहार अर्पण करून करण्यात आली. त्यानंतर उपस्थितांनी सामूहिकरित्या अभिवादन करत फुले दांपत्याच्या समाजक्रांतीतील अमूल्य योगदानाचे स्मरण केले. महात्मा फुले यांनी जातिव्यवस्थेचे निर्मूलन, अस्पृश्यता विरोध, स्त्रीशिक्षण, दलित-मागासवर्गीयांच्या हक्कांसाठी अखंड लढा दिला. शोषितांच्या जीवनात परिवर्तन घडविण्यासाठी त्यांनी सुरू केलेले सत्यशोधक चळवळ आजही प्रेरणादायी ठरते. समाजातील अंधश्रद्धा, भेदभाव, अन्यायाविरुद्ध त्यांनी उभा केलेला लढा भारतीय सामाजिक परिवर्तनाचा पाया ठरला असल्याचे यावेळी भाषणातून सांगण्यात आले.
ज्ञानदीप वाचनालयाचे पदाधिकारी यांनीही महात्मा फुले यांच्या विचारांचे महत्त्व अधोरेखित केले. समाज जागृतीसाठी वाचनाचे संस्कार आणि शिक्षणाचा प्रसार किती आवश्यक आहे, हे महात्मा फुले यांनीच दाखवून दिले असल्याचे मत त्यांनी व्यक्त केले. ग्रामीण भागात शिक्षणाची जडणघडण करण्यासाठी फुले दांपत्याने केलेल्या कार्यामुळे आजचा साक्षर व जागृत समाज घडला असल्याचे त्यांनी सांगितले.
कार्यक्रमात हनुमंतगाव भजनी मंडळ, तरुण मित्र मंडळ तसेच गावातील वाचनप्रेमी नागरिकांनी उत्साहाने सहभाग नोंदविला. तरुण मंडळाच्या कार्यकर्त्यांनी महात्मा फुले यांच्या चरित्रातील प्रेरणादायी प्रसंग, सामाजिक संघर्ष आणि समाज उन्नतीसाठी त्यांच्या कारकीर्दीतील सर्वोच्च योगदानाबाबत माहिती दिली. उपस्थित ग्रामस्थांनी फुले विचारांचे अनुकरण करण्याचा, सामाजिक समानता, बंधुभाव आणि शिक्षणाच्या प्रसारासाठी आपली बांधिलकी जाहीर केली.
महात्मा फुले यांच्या पुण्यतिथीचे औचित्य साधून वाचनालयात “सामाजिक सुधारणा आणि महात्मा फुले” या विषयावर छोटेखानी चर्चा देखील घेण्यात आली. यात तरुणांनी आजच्या काळात फुले विचारांचे महत्त्व स्पष्ट केले. समाजातील विषमता, अंधश्रद्धा आणि मागासलेल्या घटकांच्या प्रश्नांवर फुले विचार हे प्रभावी उत्तर असल्याचे मत व्यक्त झाले.
कार्यक्रमाचे प्रास्ताविक ज्ञानदीप वाचनालयाच्या सदस्यांनी केले. उपस्थितांच्या सहभागामुळे आणि सकारात्मक वातावरणामुळे कार्यक्रम अत्यंत प्रेरणादायी व यशस्वी ठरला.
