शेतकरी मित्रांनो शेतकऱ्यांसाठी ई-पीक पाहणी हा महत्त्वाचा उपक्रम राबविण्यात येत आहे. यामुळे शेतकरी आपल्या शेतातील पिकांची नोंद सातबारा उताऱ्यावर करू शकतात. हा उपक्रम शेतकऱ्यांसाठी उपयुक्त असून, विविध सरकारी योजनांचा लाभ मिळवण्यासाठी गरजेचा आहे.रब्बी हंगाम २०२४-२०२५ साठी ई-पीक पाहणी डिसेंबर २०२४ ते १५ जानेवारी २०२५या कालावधीत राबविण्यात आली होती. अनेक शेतकरी १५ जानेवारीपूर्वी आपली नोंदणी करू शकले नाहीत. अशा शेतकऱ्यांसाठी आता एक शेवटची संधी उपलब्ध करून देण्यात आली आहे.ई-पीक पाहणी वेळेवर न केल्यास काही महत्त्वाचे तोटे होऊ शकतात. जर नोंदणी नसेल, तर त्या जमिनीवर त्या हंगामात शेती झालेली नाही, असे गृहीत धरले जाईल. त्यामुळे पुढील हंगामात बँकांकडून पीक कर्ज मिळवताना अडथळे येऊ शकतात. प्रधानमंत्री पीक विमा योजनेअंतर्गत मदत घेता येणार नाही. जसे सोयाबीन व कापूस अनुदान दिले गेले, त्याप्रमाणे भविष्यातील मदतीसाठी अपात्र ठरू शकते. तसेच, वन्य प्राण्यांमुळे झालेल्या नुकसानीची भरपाई मिळवण्यासाठी पिकांची नोंद आवश्यक असते.जे शेतकरी १५ जानेवारीपूर्वी ई-पीक पाहणी करू शकले नाहीत, त्यांनी आपल्या गावातील अधिकृत सहाय्यकांच्या मदतीने त्वरित नोंदणी करावी. ही संधी १५ जानेवारीपासून पुन्हा उपलब्ध करून देण्यात आली आहे, त्यामुळे सर्व राहिलेल्या शेतकऱ्यांनी सहाय्यक स्तरावरून आपली नोंदणी लवकरात लवकर पूर्ण करावी प्रत्येक गावात तहसील कार्यालयामार्फत पीक पाहणीसाठी सहाय्यक नेमण्यात आलेले आहेत. त्यांना शासनाने अधिकृत लॉगिन दिले असून, ते आपल्या नोंदणीची प्रक्रिया पूर्ण करण्यास मदत करू शकतात. आपल्या गावातील तलाठी किंवा तालुका तहसील कार्यालय येथे जाऊन पीक पाहणी सहाय्यकांची माहिती घेऊ शकता.ई-पीक पाहणी केवळ एक औपचारिकता नसून, आपल्या हक्काच्या सरकारी योजनांचा लाभ मिळवण्यासाठी आवश्यक प्रक्रिया आहे. त्यामुळे कोणत्याही परिस्थितीत ही नोंदणी वेळेत पूर्ण करावी. आपल्या उज्ज्वल शेती भविष्याकरिता ई-पीक पाहणीची नोंदणी आजच करा.
