अहिल्यानगर :प्रतिनिधी
अहिल्यानगर – राष्ट्रीय परीक्षा एजन्सीमार्फत नीट परीक्षा २०२५ (NEET) ४ मे २०२५ रोजी दुपारी २ ते सायंकाळी ६ या वेळेत १६ केंद्रावर घेण्यात येणार आहे. परीक्षा केंद्राच्या परिसरात कोणताही गैरप्रकार होऊ नये तसेच कायदा व सुव्यवस्था अबाधित राहावी यासाठी उपविभागीय दंडाधिकारी सुधीर पाटील यांनी अहिल्यानगर उपविभागाच्या महसूल स्थळसीमेच्या हद्दीतील परीक्षा केंद्राच्या १०० मीटर परिसरामध्ये वरील दिनांकास सकाळी १० ते सायंकाळी ८ या वेळेत प्रतिबंधात्मक आदेश जारी केले आहेत.
परीक्षा केंद्राच्या १०० मीटर परिसरामधील सर्व सार्वजनिक टेलिफोन, एसटीडी. आय.एस.डी, फॅक्स केंद्र, ध्वनीक्षेपक, झेरॉक्स मशिन, स्कॅनिंग मशिन, मोबाईल फोन व इतर इलेक्ट्रॉनिक माध्यमे, वस्तु कार्यान्वित ठेवण्यात येऊ नयेत. परीक्षा उपकेंद्राच्या परिघामध्ये परिक्षार्थी म्हणून घोषित केलेले उमेदवार व परीक्षा पार पाडण्यासाठी सक्षम अधिकाऱ्यांनी प्राधिकृत केलेल्या व्यक्तीशिवाय इतर व्यक्तींना वाहनांने अथवा पायी फिरण्यास, उभे राहण्यास प्रतिबंध करण्यात आला असल्याचेही आदेशात नमूद करण्यात आले आहे.
