अहिल्यानगर मराठी न्यूज अहिल्यानगर
ह.भ.प. संदीप महाराज पवार यांच्या कीर्तनाने भक्तिमय वातावरण; भाविकांना महाप्रसादाचे वाटप
हनुमंतगाव (वार्ताहर):राहाता तालुक्यातील हनुमंतगाव येथे कार्तिक पौर्णिमेच्या (त्रिपुरारी पौर्णिमा) पवित्र निमित्ताने काकड आरती सांगता उत्साहात आणि भक्तिभावाने पार पडली. या सोहळ्याचे औचित्य साधून ह.भ.प. संदीप महाराज पवार यांच्या कीर्तनाचे आयोजन करण्यात आले होते.
कोजागरी पौर्णिमेपासून कार्तिक पौर्णिमेपर्यंत या कालावधीत हनुमंतगावातील हनुमान मंदिरात दररोज पहाटे टाळ, वीणा, मृदुंगाच्या गजरात काकड आरती केली जाते. या पारंपरिक उपक्रमातून संपूर्ण गावात दररोज पहाटेच भक्तिमय वातावरण निर्माण होते. पौर्णिमेच्या सांगतेच्या दिवशी या धार्मिक उपक्रमाचा शिखर सोहळा म्हणून उत्सवाचे आयोजन करण्यात आले.
या प्रसंगी ह.भ.प. संदीप महाराज पवार यांनी आपल्या कीर्तनातून काकड आरती आणि कार्तिक पौर्णिमेचे धार्मिक महत्त्व भाविकांना समजावून सांगितले. त्यांनी सांगितले की, या दिवशी भगवान शंकराने त्रिपुरासुराचा वध करून धर्माचे रक्षण केले. त्यामुळेच या पौर्णिमेला ‘त्रिपुरारी पौर्णिमा’ असे म्हणतात. या दिवशी केलेली पूजा, दान आणि दीपदान हे अधिक फलदायी ठरते, असा संदेश महाराजांनी भक्तांना दिला.
