अहिल्यानगर
अहिल्यानगर : राम सत्य लॉन्स, वाळुंज (ता. नगर) येथे श्री भाऊसाहेब अंबादास रोहकले सरांच्या गौरव समारंभाचे भव्य आयोजन मोठ्या उत्साहात पार पडले. या विशेष कार्यक्रमात त्यांना ३२ वर्षांच्या उल्लेखनीय शिक्षकीय सेवेनंतर सेवानिवृत्तीच्या हार्दिक शुभेच्छा देण्यात आल्या.
श्री भाऊसाहेब रोहकले सरांनी ज्ञानदीप विद्यालय, वाळुंज नगर येथे मुख्याध्यापक म्हणून कार्यरत राहून शैक्षणिक क्षेत्रात अनुकरणीय योगदान दिले. त्यांच्या प्रामाणिक, निष्ठावान व समर्पित सेवेमुळे त्यांनी शिक्षण क्षेत्रात एक प्रेरणादायी आदर्श निर्माण केला आहे.
यावेळी “ज्ञानपंढरी वारकरी” या गौरव अंकाचे प्रकाशन मान्यवरांच्या उपस्थितीत संपन्न झाले. तसेच, कार्यक्रमात उपस्थितांशी स्नेहपूर्ण संवाद साधण्यात आला.
या कार्यक्रमाला आमदार किशोर दराडे, अक्षय कर्डिले (सभापती, नगर मार्केट कमिटी), श्री भाऊसाहेब बोठे, तसेच अनेक मान्यवर उपस्थित होते. याशिवाय शिक्षकवृंद, विद्यार्थी, वाळुंज नगरचे ग्रामस्थ, तसेच विविध सामाजिक कार्यकर्ते मोठ्या संख्येने उपस्थित होते.
गौरव समारंभात उपस्थित मान्यवरांनी श्री भाऊसाहेब रोहकले सरांच्या शिक्षण क्षेत्रातील योगदानाचे मनःपूर्वक कौतुक केले. त्यांच्या कार्यकर्तृत्वाची दखल घेत त्यांचे आभार मानले आणि पुढील वाटचालीसाठी शुभेच्छा दिल्या
